İtaliya Avroviziya Mahnı Müsabiqəsinə ilk Avroviziyanın keçirildiyi il olan 1956-cı ildə qoşulmuş və ümumilikdə 45 dəfə müsabiqədə iştirak etmişdir. 1997-ci ilədək İtaliya yalnız 1981, 1982, 1986, 1994, 1995 və 1996-cı illərdə Avroviziyada iştirakdan imtina etmişdir. Buna səbəb olaraq əsasən ölkədə müsabiqəyə marağın çox az olması göstərilmişdir. 1997-ci ildə müsabiqəyə geri döndükdən sonra ölkə 1998-ci ildə heç bir açıqlama verilmədən müsabiqədə iştirakdan imtina etmişdir. İtaliya bir daha müsabiqəyə 11 illik fasilədən sonra 2011-ci ildə qayıtmışdır. İndiyədək İtaliya müsabiqədə üç dəfə qələbə qazanmışdır. Sonuncu qalibiyyət 2021-ci ildə əldə edildi. Bunu Maneskin qrupu uğurlu şəkildə "Zitti e buoni" mahnısı ilə etdilər.

İtaliya ilk Avroviziya qələbəsini 1964-cü ildə Cilyola Çinkvettinin ifa etdiyi "Non ho l'età" mahnısı ilə qazanmışdır. İkinci dəfə ölkə 1990-cı ildə məşhur italyan ifaçısı Toto Kutunyonun səsləndirdiyi "Insieme: 1992" mahnısı ilə Avroviziyada qalibiyyət əldə etmişdir. Bundan başqa İtaliya müsabiqədə beş dəfə ikinci və beş dəfə üçüncü yeri tutmuşdur. Avroviziyada iştirak etdiyi illər ərzində ölkə yalnız bir dəfə 1966-cı ildə sonuncu yerdə qərarlaşmışdır.

2011-ci ildə Avroviziyaya yenidən qoşulan ölkə Almaniya, Böyük Britaniya, Fransa və İspaniya ilə birlikdə Avroviziyanın "Böyük Beşlik" ölkələrindən biri olmuş və beləliklə hər il birbaşa olaraq müsabiqənin finalında iştirak etmək hüququ qazanmışdır. Buna səbəb isə müvafiq ölkələrin müsabiqənin ən böyük maliyyə dəstəkçiləri olmalarıdır. İtaliyanın müsabiqəyə geri dönüşü ölkə üçün uğurlu olmuşdur.^[1] Belə ki, ölkə on iki il ərzində bir dəfə birinci, üç dəfə ilk üçlükdə, doqquz dəfə isə onluqda yer almışdır.