I Stefan Nemanya (təq. 1113^[1] və ya 1114^[2] – 13 fevral 1199) — serb Raşka dövlətinin böyük jupanı, Nemaniçlər sulaləsinin banisi.

Stefan Nemanya
Studenitsa monastırının Allahın anası kilsəsində freska. 1568. Böyük jupan çar tacı ilə təsvir olunub, amma əynindəki rahib paltarıdır. O, əlində tikdiyi məbəd modelini tutub.
Raşkanın böyük jupanı
1168 – 1196
Əvvəlki	Tixomir Zavidoviç
Sonrakı	Stefan Prvovençani
Şəxsi məlumatlar
Doğum tarixi	təq. 1113[1] və ya 1114[2]
Vəfat tarixi	13 fevral 1199(1199-02-13)
Dəfn yeri	Studenitsa (monastır)
Fəaliyyəti	rəhbər[d], hərbi lider[d]
Atası	Zavida
Anası	Anna Nemaniç
Uşaqları	Vukan Nemaniç, Stefan Nemaniç[3]
Ailəsi	Nemaniçlər
Dini	ortodoks xristianlıq və Serb Pravoslav Kilsəsi
Vikianbarda əlaqəli mediafayllar

Nemanya öz böyük qardaşı Tixomiri devirməyi və Raşkanın Bizans imperiyasından müstəqilliyini əldə etməyi bacardı. Sonralar Bizans imperatorlarının süzerini tanımaq məcburiyyətində qalmasına baxmayaraq, Nemanya ölkənin Balkan yarımadasında mövqeyini gücləndirməyi bacardı və onun dövründə həmçinin Kosovo, Duklya, Travuniya, Zahumye və Neretva çayı ətrafındakı torpaqlar kimi serblərin yaşadığı əraziləri ölkənin tərkibinə daxil oldu. Bundan başqa, o, Raşka daxilində mərkəzləşdirmə siyasəti yürüdürdü və boqomilləri təqib edirdi.

Nemanyanın hakimiyyəti serb mədəniyyətinin inkişaf dövrünə təsadüf etdi. Onun hökmranlığı monumental zadujbinaların inşası ilə həkk olundu, memarlıq sahəsində isə Raşka üslubunun çiçəklənməsi başladı, bunun ən parlaq nümunəsi 1171-ci ildə Nemanya tərəfindən açılan Curcevi stupovi monastırıdır. Nemanyanın iştirakı ilə Studenitsa və Hilandar monastırları da daxil olmaqla bir çox kilsə və monastır tikilib təmir edildi.

1196-cı ildə o, hakimiyyəti ortancıl oğlu Stefana təhvil verdi və Simeon adı altında rahibliyə girdi. 1199-cu ildə Hilandar monastırında öldü, qalıqları bu gün də saxlanılan Studenitsa monastırına köçürüldü.

Serb Pravoslav Kilsəsi tərəfindən müqəddəs Simeon Mirotoçivı adı verildi.