ÇUĞUNDUR BORANISI - Anekdotlar

Bir gün Molla bazara gedirmiş. Yolda birisilə yoldaş olur. Salamkalamdan
sonra yoldaşı soruşur:
– Nə var, nə yox, Molla? Təzə xəbərdən-zaddan...
Molla deyir:
– Elə bir xəbər yoxdur. Bircə elə bu var ki, bu gecə yuxumda çuğundur
boranısı görmüşəm.
Yoldaşı deyir:
– Çıxart bir az pul ver, yuxunu yozum. Mən çox yaxşı yuxu yozanam.
Molla deyir:
– Rəhmətliyin oğlu, pulum olsaydı, badımcan alıb boranı bişirtdirib
yeyərdim, yuxuda çuğundur boranısı görməzdim də...