Nyotaymorinin mənşəyi Edo dövründə Yukakuda yerinə yetirilən vakamezake (わかめ酒^?) adlı yemək oyunu ilə bağlıdır. Vakamezake zamanı sake yapon seks işçisinin qasıq nahiyəsinə tökülürdü və sake oradan içilirdi. Samuraylar əldə etdikləri qələbəni qeyd etmək üçün geyşa evinə gedirdilər və nyotaymori praktikası geyşalar arasında populyar olmuşdur.^[2]

1960-cı illərdə Yaponiyanın iqtisadi inkişafının sürətlənməsindən sonra İşikava prefekturasındakı onsen sənayesi iş gəzintisi səbəbilə buraya səyahət edən kişi müştəriləri cəlb etmək məqsədilə nyotaymori praktikasının erotik təbiətindən yararlanmağa başlamışdır. 1980-ci illərdə onsenlərdə ailəvi ziyarətlər populyarlaşdığı üçün nyotaymori onsenlərdəki populyarlığını itirmiş və seks xidməti təklif edən qurumlar tərəfindən ekzotik əyləncə kimi istifadə olunan praktikaya çevrilmişdir.^[3][4] Yaponiyada nyotaymorini suşi servis etmə sənətinin bir növü kimi qəbul edirlər.^[5]

 

Ənənəvi nyotaymoridə model bütün tədbir boyunca uzanır və qonaqlarla danışmır. Suşi modelin üzərinə təmiz yarpaqlar vasitəsilə qoyulur: yeməyin dəri ilə birbaşa təmas etməməsinə diqqət yetirilir. İştirakçılar modellə danışa, uyğunsuz jestlərdən və şərhlərdən istifadə edə bilməzlər. Modelə narahatlıq yaradan iştirakçılar tədbirdən uzaqlaşdırılır. İştirakçılar yalnızca yemək çubuqları vasitəsilə qadının bədəni üzərindəki suşiləri alıb yeyə bilərlər, lakin bəzən birbaşa ağızla yeyilməsinə icazə verilir.^[2]

Nyotaymori üçün gözəl bədənli yox, suşini üzərində saxlaya biləcək bədən quruşuluşu olan modellərə üstünlük verilir.^[2] Seçilən modellər saatlarla tərpənmədən uzanmaq və suşinin soyuqluğuna dözmək üçün xüsusi məşqlər keçirlər. Model noytaymori üçün uzanmazdan öncə yuyunur.^[6] Suşi bədənin üzərində yerləşdirilərkən düşməyəcəyi düz nahiyələrə qoyulmasına əhəmiyyət verilir.^[1]

Nyotaymori praktikası alçaldıcı, qadın bədənini obyektləşdirən, seksist, qəddar praktika kimi tənqid olunur.^[7][8] Xüsusilə, feministlər bu praktikanı pisləyirlər. Bəzi ölkələrdə nyotaymori praktikası qadağan olunmuşdur.^[9] 2005-ci ildə Çin sağlamlığa zərərli və əxlaqsız olduğunu əsas gətirərək bu praktikanı qadağan etdiyini açıqlamışdır.^[10]